Հարգելի քաղաքացիներ,

Ողջունում եմ Ձեզ ՀՀ կառավարությանն առընթեր անշարժ գույքի կադաստրի պետական կոմիտեի կայքէջում, որտեղ Դուք կգտնեք համակագված և ընդգրկուն տեղեկատվություն կոմիտեի աշխատանքային գործունեության, անշարժ գույքի շուկայի, հողային հաշվեկշռի, հողի հարկի և գույքահարկի բազաների վերաբերյալ:

Կոմիտեի գործունեության թափանցիկության և մատչելիության ապահովման, բաց և հրապարակային աշխատանքի, ինչպես նաև բնակչության և տեղական ինքնակառավարման մարմինների ղեկավարների իրազեկման և տեղեկացվածության մակարդակի բարձրացման նպատակով կադաստրի համակարգում մշտապես լայնածավալ աշխատանքներ են իրականացվել, ինչի ապացույցն է նաև մեր կայքի նոր ու թարմացված տարբերակը:

Համալրելով կայքը նորամուծություններով, քաղաքացիների համար օգտակար տեղեկատվությամբ, կադաստրի պետական կոմիտեի գործունեությունը լուսաբանող տարաբնույթ բաժիններով` մենք կփորձենք հասարակության համար հնարավորինս թափանցիկ դարձնել մեր աշխատանքը:

Մեր կայքում կարող եք ծանոթանալ Հայաստանի ազգային ատլասի Ա և Բ հատորներին, ինչպես նաև ինքնուրույն հաշվել Ձեր անշարժ գույքի կադաստրային արժեքն ու գույքահարկը:

Կոմիտեի կայքէջում կարող եք ծանոթանալ նաև մեր աշխատակազմի գործունեության, կառուցվածքի առանձնահատկություններին, իսկ "Հարց ու պատասխան" բաժնում գտնեք Ձեզ հուզող հարցերի պատասխանները:

Կարևորելով Ձեր կարծիքներն ու առաջարկները հանրությանը հուզող հարցերի շուրջ` ակնկալում ենք Ձեր մեկնաբանություններն ու արձագանքները, որոնք շատ կարևոր են Կոմիտեի աշխատակազմի համար:

Հիրավի, հանրության վստահությունն ու հետաքրքրությունը մեր աշխատանքի նկատմամբ պարտավորեցնում է մեզ պարբերաբար հարստացնել կայքը հետաքրքիր և օգտակար տեղեկատվությամբ:

Շնորհակալություն համագործակցության համար:

Կոմիտեի նախագահ` Երվանդ Զախարյան

ՊԱՇՏՈՆԱԿԱՆ ԼՐԱՀՈՍ

ՀԱՅԱՍՏԱՆԻ ԱԶԳԱՅԻՆ ԱՏԼԱՍ