Սույն թվականի հունիսի 20-25-ին առցանց ձևաչափով անցկացվեց Չափագրողների միջազգային ասոցիացիայի (FIG) աշխատանքային շաբաթը, որը կրում էր «Խելացի չափագրողներ հողի և ջրի կառավարման համար. Մարտահրավերներ նոր իրականության մեջ» խորագիրը: Միջոցառումների շարքը միավորվելու և համագործակցելու հնարավորություն  տվեց աշխարհի բոլոր գեոդեզիստներին՝ այդ թվում նաև ՀՀ Կադաստրի կոմիտեի  գեոդեզիայի և հողաշինարարության վարչության և Գեոմատիկայի կենտրոնի մասնագետներին:

Առցանց աշխատաժողովը  բաղկացած էր մի շարք նստաշրջաններից։ Հանդիպումների ընթացքում համակարգողները ընդգծեցին խելացի չափագրման հողային և ջրային ռեսուրսների ինտեգրված կառավարման, չափագրողների միջազգային ասոցիացիայի (FIG) առջև դրված խնդիրների, ինչպես նաև անհրաժեշտ տեխնոլոգիաների, մեթոդների և ընթացակարգերի  կարևորությունը՝  գեոդեզիական մարտահրավերների լուծման համար: Միջոցառման ընթացքում հանդես եկան  տարբեր մասնագիտական ուղղություններ ներկայացնող  բանախոսներ։ Մասնակիցներին  նաև հնարավորություն էր ընդձեռված աշխատաժողովի ընթացքում ձևավորել ցանց՝ գործընկերային կապերի ընդլայնման և գիտելիքների փոխանակման համար:

Հանդիպման ավարտին, բոլոր մասնակիցները ևս մեկ անգամ փաստեցին  նմանատիպ հանդիպումների կազմակերպման կարևորությունն ու արդյունավետությունը: